ЭНЕ ЫЙЫК, ЭНЕ КЫМБАТ БААРЫНАН

2026-жылдын 30-майында Ак-Моюн айылында аялдар кеңеши уюштурган “Энелер күнүнө” арналган иш-чара өткөрүлдү. Иш чаранын негизги максаты-“Тарбия үй-бүлөдөн башталат” деген улуу наркты даңазалоо, жаш муундарга улуттук баалуулуктарды, каада-салттарды, үрп-адаттарды жана энелердин коомдогу ордун кеңири таанытуу болду. Ошондой эле ата-бабалардан мурас болуп келген улуттук тамак-аштардын түрлөрүн, кол өнөрчүлүктү көргөзмөгө коюп, кыргыз элинин бай маданий мурасын кийинки муундарга өткөрүп берүү максат кылынып, катышуучулар улуттук каада-салттар боюнча сахналаштырылган көрүнүштөрдү тартуулашып, көрүүчүлөрдүн кызыгуусун арттырышты. Энелердин үй-бүлөнү бекемдөөдө, балдарды тарбиялоодо жана улуттук нарктарды сактап калууда кошкон салымын өзгөчө белгилешип, конкурста жеңген командаларга жана активдүү катышуучуларга уюштуруучулар тарабынан дипломдор жана акчалай сыйлыктар тапшырылып, энелерге терең ыраазычылык билдирилди.